معادلة التسويف

المرة اللي فاتت عرفنا يعني ايه تسويف وايه أسبابه.
النهاردة هنعرف شوية حلول لذيذة 😍

كتب الباحث بييرز ستيل كتاب #معادلة_التسويف، قال فيه أن مقدار التسويف بيتناسب عكسيا مع مقدار التحفيز، يعني كل ما كان في حافز كبير يشجعك كل ما قل التسويف، والتحفيز بيتأثر بعدة عوامل مذكورين في معادلة سوا، والمعادلة متكونة من عدة عناصر

*التحفيز = القيمة × التوقعات / مقدار المدة الزمنية المطلوبة للحصول على عائد × مقدار الاندفاعية

يعني ايه؟؟ هنشرح بالتفصيل
١- قيمة العائد بعد الانتهاء من العمل سواء كان عائد مادي/نفسي/جسدي، طيب لو زودنا القيمة دي هنزود التحفيز لكن ازاي؟
من خلال الآتي:
* متدخلش في شغل العائد منه بخس أوي
* حط مكافئات زيادة تشجعك سواء كانت صغيرة زي وقت مقتطع في النص او كبير زي سفرية حلوة او لاب هتجيبه بعد ما تخلص مشروعك
* فكر في النتائج السلبية اللي هتكون لو مخلصتش شغلك؟ هتترفد؟ هتسقط ف الدراسة؟ هتخسر أهلك؟
٢- مقدار توقعك لقدرتك على التنفيذ، وأكتر ناس بيقعو في دي هما الساعين للكمالية perfectionists ، لو زودنا مقدار التوقع دا هيزيد التحفيز، طيب دا هنعمله ازاي؟
من خلال الآتي:
* تقسيم العمل لأجزاء سهل تنفيذها (success spirals)، ودا هيسهل المهام الصعبة الكبيرة اللي بمجرد ما بتفكر فيها بتحس ان عمرها ما هتخلص
* ابحث عن الأجزاء الصعبة في المهمة ودور لها على حلول مناسبة عشان تفك التعقيدة
* تفائل خير ^^

العنصريين الجايين لو نقصو هيزودو التحفيز
٣- مقدار المدة الزمنية المطلوبة للحصول على العائد، بمعني ان المهام اللي بتخلص بسرعة وبتاخد مكافأة سريعة بعدها بتكون أسهل من المهام طويلة المدى واللي نتايجها بتظهر متأخر اوي، ودا عامل صعب التحكم فيه، لكن ممكن تقسيم الهدف الكبير لأهداف أصغر تحس بعدها بإنجاز
٤- الاندفاعية، يعني مقدار الضعف قدام المشتتات، وبيقل كل ما قوة العزيمة كانت صغيرة.
في ناس بتعاني من العنصر دا بشكل كبير جدا وهما الناس اللي عندها فرط حركة ونقص الانتباه ADHD لكن في عوامل ممكن تساعد زي:
* انك تشتغل على تقوية إرادتك على المدى البعيد
* وعلي المدى القريب ممكن تاخد خطوات عملية بسيطة زي
(Promodoro technique) انك تقسم وقت العمل ل ٢٥ دقيقة شغل ٥ دقايق راحة، او اقل ممكن ١٥ دقيقة او اكتر ل ٣٠ دقيقة، ممكن تستخدم تايمر، ودا بيساعد عقلك على التركيز
* كتابة قائمة بالمشتتات، تجيب ورقة وقلم جنبك، كل ما دماغك تفتكر الحاجة الفولانية اللي كنت عايز تعملها اكتبها ف الورقة عشان عقلك يطمن انك مش ناسيها، وابعد عن اي مشتتات زي الموبايل ممكن تحطه ف اوضة مختلفة، او ممكن تروح مكان للمذاكرة يكون مهيأ يساعدك على التركيز.

وبكدا نكون خلصنا المعادلة دي، لو فهمتها أبدأ طبقها ع نفسك وشوف انهي عامل بيؤثر عليك اكتر وأبدأ اشتغل عليه، وأكثر عامل ممكن يكون صعب هو الأخير لانه يخص الانسان لكن كل اللي قبله كانو يخصو الشغل نفسه.

أتمنى تكونو استفدتو من الرحلة معانا 😍
دمتم بخير، تابعونا لمزيد من الوعي 🤍

#procrastination_equation
#psycho_talks
#mental_health
#SDGs_3